SUATEA ,ante´l trunfalismu de les instituciones nesta Selmana de les Lletres quier denunciar públicamente la mala política educativa fecha por esta Conseyería no que cinca a les enseñances de Llingua Asturiana asina comu l´estancamientu nesti tema.
La Conseyería debe tomar una serie midíes empobinaes a una normalización de la Llingua nel sistema educativu.
Nel mes que tamos ya a fines de cursu , vemos con indignación varios temes que nun meyoren nin muncho menos la situación.
N´Educación Infantil nun s´ufierta en tolos centros sinón namás n´aquellos nos que´l profesoráu tien disponibilidá. Esto ye, unos centros tiénenlo y otros non colo que supón d´incumplimientu de la Llei d´usu qu´obliga a ufiertalo en toles estayes educatives.
En E.Primaria nun se cumple l´alcuerdu de plantilles del 7 de setiembre de 2000, firmáu por toles organizaciones sindicales, según el cual tien d´haber un profesor d´asturianu a tiempu completu en tolos centros considerando les itinerancies comu escepcionales y non comu fai esta Alministración pa la que lo habitual ye compartir centros.
En munchos centros siguen tamién incumpliendo la llei puesto que nel horariu figura comu alternativa Cultura Asturiana y dalgunos/es aprovechen p´avanzar materia colo qu´eso tien d´illegalidá,faense agrupamientos de´alumnáu metiendo a tolos de llingua nun grupu ...
Na E.S.O. y Bachiller l ´asignatura sigue siendo optativa y non voluntaria lo qu´incumple tamién la Llei d´Usu que fala de voluntariedá y non d´optatividá (Art.10)
Esto,anque paeza lo mesmo nun lo ye puesto que si fuera voluntaria tendría la so alternativa regulada comu en primaria mentantu que siendo optativa compite col restu de materies optatives .Hai centros onde la Llingua Asturiana nun s´ufiertó nos impresos de matriculación o onde se desvía alumnáu ,que previamente escoyera llingua, hacia otres asignatures
Y ya pa que falar de la Educación Permanente d´Adultos onde esta alministración nin siquiera se lo plantega incumpliendo otra vegada la Llei d´Usu (Art.10).
Siguimos coles Escules Oficiales d´Idiomes o la Universidá onde entovía sigui ensin especialidá de Filoloxía Asturiana.
No que cinca al profesoráu, la inestabilidá ye la tónica dominante : l´alumnáu cambia tolos años de profesores lo que supón un pilancu pa la estabilidá d´esta materia.
¿Por qué el profesoráu definitivu pue dar Asturianu cuandu -y convién a l´ Alministración y nun pue concursar por ello?¿Por qué nun se reconoz la especialidá?¿Por qué nun se convoquen oposiciones ?
El Conseyeru comprometiérase en declaraciones a la prensa a lluchar pol reconocimientu de la especialidá y la catalogación de puestos nel presente cursu y a estes altures nun sabemos entovía ná del asuntu.
Nos centros nun se reciben materiales y nun existe un departamentu específicu onde dirixise pa tratar los temes referíos a llingua.
Nun mos valen les disculpes,la ufierta de Llingua Asturiana tien de ser en tolos centros y en toles estayes educatives que ye lo que manda la Llei d´Usu o ¿ye qu ´esti Gobiernu sólo fala de lleis cuando - yos interesa.
Pero nun sólo ye ufiertala ,sinón que hai que meyorar les condiciones nes que s´alcuentra pa tener les mesmes garantíes qu´el restu les materies.
Too esto solucionaríase col reconocimientu de la Oficialidá de la LLingua Asturiana ya que ye un Derechu Universal que se-y tien de reconocer al pueblu asturianu pa que la democracia seya d´una vegada una realidá n´Asturies

Secretaría de LLingua de SUATEA
UVIËU 3 de mayu de 2005