POLA DEFENSA DE TOLES LLINGÜES

Dende SUATEA aplaudimos la idea del Colexu “Río Piles” ante la iniciativa de deprender a los neños y neñes la “Llingua de signos”.

Gustaríanos que los escolinos d’asturianu tuviesen la oportunidá de deprender dicha llingua.

Dende SUATEA aplaudiremos siempre toes aquelles iniciativas que vayan orientaes a la integración y por mor a fin d’evitar perxuicios a terceros consideramos que sedría más apropiáu qu’estes hores de formación integrásense n’hores d’alternativa a la relixón, que nun tien conteníos curriculares. Amás dos llingües nun deberíen competir nel horariu de los escolinos, sinón que l’alministración tien que  dar la oportunidá a toos/es de deprender toles llingües. SUATEA lleva años defendiendo que nun se faiga competencia ente les llingües y que tol alumnáu tea esta oportunidá.

L’asignatura  d’asturianu sí tien conteníos curriculares en primaria, y tien continuidá en secundaria, polo que la formación de base ye perimportante.

Paeznos que la iniciativa ye tan interesante que, esistiendo como esisten hores con conteníos non curriculares a lo llargo de tola primaria, sedría deseable que s’ampliase a tolos niveles.

N’Uviéu a 25 de xineru de 2008

Secretaría de la Llingua de SUATEA