NUEVU ATAQUE  A LOS DERECHOS LLINGÜÍSTICOS DE LOS ASTURIANOS

El día  11 setiembre de 2008, publicóse nel BOPA, el decretu  del gobiernu d'Asturies onde s'establez el currículu del segundu ciclu d'Educación Infantil y nél nun apaez referencia nenguna a la Llingua Asturiana o Gallego-Asturiano.  Dende SUATEA denunciamos énte tola comunidá educativa y tola sociedá asturiana:

• Qu'esto supón un ataque frontal y premeditáu  a los derechos educativos y llingüísticos del alumnáu y los pas asturianos, arreblagando  pa ello percima del ordenamientu xurídicu d'anguaño. Llei d´usu y promoción del Bable /Asturianu de 1/98 de 23 de marzu. Dientro del capítulu 3 que fala de la enseñanza, nel artículu 10 noma’l currículu:

10.1-“Nel exerciciu de les sos competencies, el Principáu d´Asturies garantizará  la enseñanza del Asturianu y Gallego-Asturiano  en tolos niveles y graos, respetando la voluntariedá del so deprendizax. En tou casu, impartiráse nel horariu escolar  y sedrá consideráu como materia integrante del currículu.

• Que’l que nun apaeza la Llingua Asturiana o’l Gallego-Asturiano nel currículu supón esconder, prindar, estirpar conscientemente y adré, la llingua ambiental y materna de munchos de los escolinos y patrimoniu esencial de caltenimientu y arramamientu de la nuestra cultura inmaterial. Esta  llingua ye’l principal instrumentu que los xunce emocionalmente col so entornu (padres, familia, amigos, sociedá) y el vehículu fundamental  y puntu de partida del desarrollu del so pensamientu.
• Qu’esti fechu atenta contra los principios pedagóxicos fundamentales actuales:
• Deprendizax significativu: l’alumnáu tien de notar que’l deprendizax llingüísticu nun ye dalgo impuesto dende fuera y ayeno a los sos intereses, sinón partir de lo que’l neñu conoz.
• Atención a la diversidá: implica asumir los usos llingüísticos de los alumnos.
• Partir del  nivel de desarrollu del alumnáu considerando’l so momentu de desarrollu sicoevolutivu y los conocimientos previos que yá tien construyíos.
• Nun tien xacíu que la nuestra llingua tea presente nel currículu d’Educación Primaria y que nel d’Educación Infantil (etapa esencial y crítica nel deprendizax llingüísticu según tolos sicollingüistes y sociólogos) nun se sabe’l porqué, esapaez. ¿Nun sedrá que los responsables del raptu  sí saben esto y aprovechen pa reprogramar al nuestru alumnáu nes llingües qu’a ellos-yos paecen de “provechu” y más convenientes.

Nuna sociedá que se pretende democrática nun pue caltenese una xerarquización llingüística fundamentada en desigualdaes polítiques, sociales, étniques o culturales y nel nuestru casu un auténticu “apartheid” del alumnáu asturiano al que se-y secuestra nel sistema educativu l’elementu esencial de la so cultura: la Llingua Asturiana o’l Gallego-Asturiano. Poro, dende SUATEA desiximos al gobiernu asturianu que respete los derechos fundamentales de los asturianos introduciendo nel currículu actual del segundu ciclu d’Educación Infantil la Llingua Asturiana o’l Gallego-Asturiano naquellos territorios asturianos onde se fala. Mentanto, defenderemos ente los tribunales de xusticia los nuestros derechos pidiendo que l’actual currículu los respete.